Last time, we been try sabi wetin web3 be and some things wey you fit do with web3. Today we go learn one important thing wey be sey, if this thing no dey, nothing like web3 go dey possible. Wetin be that? Oyibo call am Blockchain

Wetin be Blockchain?

I go use simple example take help you understand am. Imagine sey you dey work as person wey dey sell something for person shop. Every shop dey normally get book where them dey write all the things them buy and sell and the money people pay them. Your shop wey you dey work get that kind book too. Normally, anybody fit write for this book and still clean am or change the numbers wey dey inside this book anytime them like. So if something dey miss, e go hard to find the thing or catch anybody wey dey collect am. Una manager or owner of the shop come decide sey he go bring book wey nobody go fit change anything inside. As customers dey buy, the book dey write everything down and no mistake. E dey track every money wey enter and comot from the shop. And person no go fit just go cancel anything inside the book or change am to favour them because e dey impossible. Na so blockchain be, oyibo man call am “digital ledger" one big book wey dey record everything wey dey go on for inside web3. E no dey miss anything and nobody fit add or remove anything comot from inside. The sweet part about this book na sey, everybody go fit see wetin them write inside. E de open to everybody eye, no be secret. The security for this strong wella wey make nobody go fit try to clean or add anything put inside. You fit dey wonder, why them call am “Blockchain”? Na because of the way the different things wey de record inside there de dey. E be like where them stack plenty block. And each block get connection with the next one wey make them call am chain because the connection be like how chain be if you see am.

Why Blockchain dey really important?

I go give two strong reasons with this example them:

1. When you dey use bank send money, you go need bank to tell you if the money you de send don go or if the one you de receive don come. And bank sef still dey charge you money to tell you all that one. But for blockchain, when you send person money, you go see am for blockchain sey e don receive am. No need for bank to help you verify.
2. When you buy land, you go need lawyer people them to help you verify your land and prove sey na you get am. But with blockchain, everything don dey open for everybody to see sey na you get the land now so no need to verify or prove sey na you get am.

You see how strong blockchain be? Na blockchain be the koko for web3. Together with the power and control wey every web3 user get to do anything them want without anybody to decide for them, blockchain na e dey help keep every record for correct way and make nothing do am.

Things wey Blockchain dey record

• Blockchain dey record when two people send each other something (like money, NFTs etc.)
• Blockchain dey record when person start business inside web3
• Blockchain still dey record when person do art and sell am to people
• Blockchain dey record when people dey vote for something
• Blockchain fit still write who do something first because e dey keep the time and day. E.g five people fit dey rush to vote for person, blockchain go fit tell you the first person wey vote and the last, even if them do am same time.

This na the power wey blockchain get and if we use am well, we go fit really benefit from am.